Türkiyənin kəşf edilmiş yataqlarında ildə 50 tona qədər qızıl hasil edilə bilər ki, bu da qiymətli metal qiymətlərinin qlobal artması fonunda xüsusilə əhəmiyyətlidir.

Presedenttv.com xəbər verir ki, bunu jurnalistlərə Türkiyə Mədənçilər Assosiasiyasının (TMD) sədri Mehmet Yılmaz bildirib.

O qeyd edib ki, geosiyasi risklər fonunda bir çox investor qızılı “təhlükəsiz sığınacaq” kimi qəbul edir.

“Qızılın bir unsiyası ilin sonuna qədər 4500 dollara qədər yüksələ bilər və bu, son hədd deyil. Biz 2027-ci ildə qiymətlərin daha da artacağını proqnozlaşdırırıq”, - deyə M. Yılmaz bildirib. O qeyd edib ki, qlobal miqyasda qızıl hasilatının orta xərci bir unsiya üçün cəmi 2400 dollardır.

O, ən pis ssenaridə belə qızılın qiymətinin 3000 dollardan aşağı düşməyəcəyini, yəni alıcılar üçün itki riskinin olmadığını qeyd edib.

Türkiyənin qızıl yataqlarının potensialına toxunan TMD rəhbəri xatırladıb ki, ölkədə azı 6500 ton qızıl olduğuna dair ekspert proqnozları var.