Yaxın Şərqdə vəziyyətin son dərəcə kəskinləşməsi ilə əlaqədar Almaniyada da təhlükəsizlik tədbirləri gücləndirilib.
Presedenttv.com “Welt” televiziyasına istinadla xəbər verir ki, Xarici İşlər Nazirliyinin internet səhifəsində səfər tövsiyələri yenilənib, İsraildə istənilən an pilotsuz uçuş aparatlarının və raket hücumlarının baş verə biləcəyi qeyd olunub.
“Lufthansa” şirkəti iyulun 31-dək Tehrana uçuşları dayandırdığını açıqlayıb. Şirkət Təl-Əvivə uçuşların dayandırılmasını iyulun sonuna qədər uzadıb. Bundan başqa, İordaniyanın Əmman, İraqın Ərbil və Livanın Beyrut şəhərlərinə də uçuşlar ən azı bir həftə müddətinə dayandırılıb. Həmin ölkələrin hava məkanından istifadədən də müvəqqəti imtina edilib. İsrailin Berlindəki səfirliyi gün ərzində fəaliyyət göstərməyib.
Kansler Fridrix Merts ölkədəki yəhudi və israilli qurumların qorunması məqsədilə təhlükəsizlik tədbirlərinin gücləndirildiyini açıqlayıb. F.Merts vəziyyətlə bağlı İsrailin Baş naziri ilə telefon danışığından sonra Almaniya hökumətinin təhlükəsizlik kabinetinin iclasını çağırıb.
Daxili işlər naziri Aleksander Dobrindt federal əyalətlərin daxili işlər nazirlərinin Bremerhaven şəhərində keçirilən iclasında nazirliklərin rəhbərlərini yaranmış vəziyyət barədə məlumatlandırıb.