PresedentTv.com xəbər verir ki, Mingəçevir şəhərində “Fərqindəlik” layihəsi çərçivəsində “Erkən müayinə can qurtarır!” adlı tibbi aksiya keçirilib.
“Fərqindəlik” layihəsinin rəhbəri Şəbnəm Həsənovanın AZƏRTAC-ın bölgə müxbirinə verdiyi məlumata görə, Səhiyyə Nazirliyinin, “PAŞA Holdinq”in birgə təşkilatçılığı ilə reallaşan layihənin məqsədi əhalinin sağlamlığının qorunmasına töhfə vermək, erkən diaqnostikanın əhəmiyyətinə diqqət çəkmək, tibbi maarifləndirməni artırmaq, insanlara keyfiyyətli tibbi xidmət göstərməkdir.
Aksiyada Mingəçevir sakinləri endokrinoloq Fərhad Burzunun rəhbərliyi ilə 6 nəfərlik ixtisaslı tibbi heyət tərəfindən ödənişsiz tibbi müayinələrə cəlb olunub, onlara ilkin analizlər və fərdi məsləhətlər təqdim edilib. “Məqsədimiz insanlara təkcə tibbi xidmət göstərmək deyil, onların sağlamlıqla bağlı düşüncələrində dönüş yaratmaq, “heç bir şikayətim yoxdur” düşüncəsinin arxasında gizlənən riskləri göstərməkdir. Tibbi müayinələrə maraq böyükdür”, - deyə Şəbnəm Həsənova qeyd edib.
Tibbi aksiyada 520-yə yaxın şəhər sakini iştirak edib və 107 nəfərə yerində şəkərli diabet diaqnozu qoyulub. Həmin vətəndaşlara ödənişsiz şəkildə qlükometr cihazı hədiyyə edilib. İzah olunub ki, erkən müayinə diabetin həm fiziki, həm də sosial təsirlərini azaltmağa kömək edir.
Müayinələrdən keçən və həkim məsləhəti alan şəhər sakinləri bu təşəbbüsü yüksək qiymətləndiriblər və davamlı olmasını arzulayıblar.
Mingəçevir şəhərindən öncə Masallı, Xaçmaz, Sabirabad və Göyçay rayonlarında təşkil edilən tibbi aksiyanın növbəti ünvanı aprelin 12-də Zaqatala rayonu, daha sonra isə Gəncə şəhəri və azad edilmiş ərazilər olacaq. “Fərqindəlik” layihəsi çərçivəsində ölkə üzrə müxtəlif şəhər və rayonlarda xərçəng xəstəliyinin, eləcə də kardioloji problemlərin erkən aşkarlanması ilə bağlı aksiyaların təşkili də nəzərdə tutulub.