“Qlobal Əməkdaşlıq və Analitik Araşdırmalar Mərkəzi” İB-nin sədri və qurumun nəzdində fəaliyyət göstərən Beynəlxalq Multikultural Şəbəkənin rəhbəri Xəyalə Məmmədova və Beynəlxalq Multikultural Şəbəkənin Filippin üzrə nümayəndəsi Darin Jan C. Tindovenin Azərbaycan şəhərsalma və memarlığında multikulturalizmin izlərinə həsr edilmiş araşdırma-məqaləsi dərc edilib.

Avqustun 17-də Böyük Britaniyanın tanınmış Multikulturalizm qəzeti sayılan, həm ingilis, həm də ispan dilində yayımlanan “The Prisma” mətbu orqanında elmi-tədqiqatçı Xəyalə Məmmədova və Darin Jan C.Tindovenin “Multicultural identity: Urban traces in Azerbaijan” (Multikultural kimlik: Azərbaycan şəhərsalmasında izləri”) adlı məqaləsi dərc edilib.

Məqalədə Azərbaycanın şəhərsalma və memarlıq tarixinin əsrlər boyu formalaşması, tarixi memarlıq abidələrinin milli-mədəni irsinin mühüm simvollarına çevrilməsi, Azərbaycan orta əsr memarlıq məktəbinin inkişafında Əcəmi Naxçıvaninin yaradıcılığından bəhs edilib. Ümummilli Lider Heydər Əliyevin Azərbaycana rəhbərlik etdiyi dövrdə ölkənin şəhərsalma və memarlıq tarixində mühüm inkişaf mərhələlərindən biri kimi qeyd edilməsi ilə yanaşı, tarixi-memarlıq irsinin mühafizəsi, abidələrin bərpası və şəhərlərin mövcud simasının saxlanılması istiqamətində ciddi işlər görülməsi ilə bağlı geniş məlumat verilib.

Azərbaycan Respublikasında şəhərsalma və memarlıq sahəsinin inkişafına verilən yüksək dövlət diqqətinin bariz nümunəsi olaraq Azərbaycan Respublikası Prezidenti tərəfindən 2026-cı ilin “Şəhərsalma və Memarlıq İli” elan edilməsi də bu sahənin strateji prioritet kimi müəyyən olunduğunu göstərir.

“Şəhərsalma və Memarlıq İli”nin elan olunması Azərbaycanda şəhərsalma siyasətinin yeni mərhələyə keçidini ifadə edir, tarix və mədəniyyət abidələrinin qorunmasının hüquqi təminatının daha da gücləndirilməsinə xidmət edir. Bu kontekstdə mayın 17-dən 22-dək Bakıda keçirilən BMT-nin Məskunlaşma Proqramının Ümumdünya Şəhərsalma Forumunun 13-cü Sessiyası (WUF13) xüsusi əhəmiyyət kəsb edib. Bu tədbirin Bakıda keçirilməsi ölkənin dayanıqlı şəhər inkişafı, innovativ şəhərsalma və müasir yaşayış mühitinin formalaşdırılması sahəsində əldə etdiyi təcrübənin beynəlxalq səviyyədə təqdim olunması baxımından əhəmiyyətli idi