ABŞ və İsrail İrana zərbə endirməyə hazırlaşır.
Globalinfo.az xəbər verir ki, bu barədə “Daily Mail” nəşri mənbələrə istinadən məlumat yayıb.
Bildirilir ki, ABŞ və İsrail İranın nüvə proqramından qaynaqlanan təhdidi aradan qaldırmaq üçün bu ölkəyə zərbə endirə bilər.
“Məlumata görə, Tramp İrana hava zərbəsi endirməyi planlaşdırır. Yüksək səviyyəli siyasi, hərbi və diplomatik mənbələrə əsasən, ABŞ və İsrail İranın nüvə proqramından doğan təhlükəni tamamilə aradan qaldırmaq üçün hücuma hazırlaşır”, – deyə məqalədə bildirilir.
Qeyd olunur ki, daha əvvəl də İranın nüvə proqramına qarşı hərbi əməliyyat ehtimalları müzakirə olunub, lakin bu dəfə həm ABŞ, həm də İsrailin təkcə təhdid səsləndirməklə kifayətlənməyəcəyinə dair açıq sübutlar var.
İran parlamentinin Milli təhlükəsizlik və xarici siyasət komitəsinin sədri İbrahim Əzizi ABŞ-ın təhdidlərinə reaksiya verib. O bildirib ki, “İran ərazisinə daxil olan hər kəsin ayağını kəsəcəklər”.
Qeyd edilir ki, bir qədər əvvəl ABŞ Çaqos adalarındakı bazasına üç “B2 Spirit” bombardmançı təyyarəsini yerləşdirdi və bu, nadir hadisədir”.
Xatırladaq ki, martın 28-də ABŞ prezidenti Donald Tramp İran rəhbərliyi ilə nüvə proqramı ilə bağlı razılıq əldə olunmazsa, bu ölkənin ciddi nəticələrlə üzləşə biləcəyini deyib. O, İran hökumətinə məktub göndərildiyini xatırladıb və qeyd edib ki, Tehran ya Vaşinqtonla danışıqlara getməli, ya da ağır nəticələrə hazır olmalıdır.