Son dörd ildə Böyük Britaniya miqrantların ölkəni tərk etməsi üçün 53 milyon funt sterlinq ödəyib
Bu barədə “The Independent” qəzeti məlumat yayıb. Hökumətin həyata keçirdiyi könüllü qayıdış proqramı çərçivəsində miqrantlara vətənə dönmələri üçün 3 min funt sterlinqədək maliyyə dəstəyi göstərilir, onların təyyarə biletləri də dövlət tərəfindən qarşılanır. Bu proses “yardımlı qayıdış” (assisted return) adı ilə tanınır və son illər ərzində bu növ qayıdışların sayı əhəmiyyətli dərəcədə artıb.
Rəsmi məlumatlara əsasən, 2021–2024-cü illər ərzində ümumilikdə 13 637 nəfər yardımlı qayıdış proqramından faydalanıb. Təkcə 2024-cü ildə bu proqram çərçivəsində 6 799 nəfər vətəninə geri dönüb. Müqayisə üçün qeyd edək ki, 2022-ci ildə bu rəqəm 2 179 nəfər olub.
Yardımlı qayıdış üçün əsasən inkişaf etməkdə olan ölkələrdən olan şəxslər, sığınacaq müraciəti rədd edilənlər, insan alveri qurbanları, küçələrdə yaşayanlar və tibbi problemi olan şəxslər müraciət edə bilirlər. 2024-cü ildə yardımlı qayıdışı qəbul edənlər arasında ilk yerdə Braziliya vətəndaşları (3 573 nəfər) olub. Onları 915 nəfərlə Hindistan, 271 nəfərlə isə Honduras vətəndaşları izləyib.
