BMT Baş Assambleyasında çıxış edən Qırğızıstan Prezidenti Sadır Japarov Birləşmiş Millətlər Təşkilatını, beynəlxalq maliyyə qurumlarını və donor ölkələri Qırğızıstanın İssık-Kul gölünün qorunması üçün xüsusi birgə etimad fondu yaratmaq təşəbbüsünü dəstəkləməyə çağırıb.

Presedenttv.com “Kabar” agentliyinə istinadla xəbər verir ki, dövlət başçısının sözlərinə görə, UNESCO-nun biosfer qoruğu və beynəlxalq əhəmiyyətli Ramsar Konvensiyası bataqlığı olan unikal yüksək hündürlüklü göl hazırda ciddi iqlim gərginliyi yaşayır. “Son 170 ildə suyun səviyyəsi təxminən 14 metr düşüb və 2021-ci ildən bəri azalma sürəti ildə 7 santimetrə çatıb”, - deyə Sadır Japarov qeyd edib.

O bildirib ki, tarixən İssık-Kul gölünə tökülən 101 çaydan yalnız 30-u hazırda ilboyu axır. Gölün əsas su mənbələri Tyan-Şan buzlaqlarıdır. Son 70 ildə dağ buzlaqlarının 30 faizindən çoxu əriyib və bu itkinin təxminən 20 faizi 7-10 ildə baş verib.

Qırğızıstan Prezidenti vurğulayıb ki, bu dəyişikliklər regionun biomüxtəlifliyinə və yüz minlərlə insanın iqtisadi dayanıqlığına təhlükə yaradır. O əlavə edib: “İqlim dəyişikliyinin miqyası və sürəti istənilən dağ dövlətinin imkanlarını aşır və beynəlxalq səviyyədə birgə tədbirlərin görülməsini tələb edir”.

Sadır Japarovun sözlərinə görə, Qırğızıstan artıq 2030-cu ilə qədər İssık-Kulun ekoloji və iqtisadi sisteminin dayanıqlı inkişafı üzrə dövlət konsepsiyasını həyata keçirir, ekoloji məhdudiyyətlər tətbiq edir, sualtı robotlardan istifadə edərək gölün dərinliyini izləyir, onun dibini və sularını müntəzəm olaraq təmizləyir.

Dövlət başçısı İssık-Kulun qorunması üçün BMT-nin himayəsi altında xüsusi birgə etimad fondunun yaradılmasını təklif edib. O, Qırğızıstanın öz öhdəliyini konkret maliyyə töhfəsi ilə dəstəkləməyə hazır olduğunu vurğulayıb.

“Biz dövlət büdcəsindən bu fonda 10 milyon dollar ayırmağa hazırıq”, - deyə Sadır Japarov bildirib. Prezident qeyd edib ki, Aral dənizinin və Çad gölünün taleyi iqlim dəyişikliyinin böyük su hövzələri üçün mümkün nəticələri barədə xəbərdarlıq olmalıdır.