Presedenttv.com Azərtaca istinadən xəbər verir ki, Kiyevə edilən ballistik raket hücumu nəticəsində şəhərin mərkəzi hissəsi, “Lukyanovka” metrosu ətrafına ciddi ziyan dəyib.
Azərtacın-ın hadisə yerində olan xüsusi müxbirinin məlumatına görə, zərərsizləşdirilən raketlərin qalıqları metro ətrafında olan hündürmərtəbəli yaşayış binalarına, iaşə obyektlərinə, restoranlara ziyan vurub. Raketin qalığı yolda 4-5 metr dərinliyində yarıq yaradıb.
Ukrayna Hərbi Hava Qüvvələri raketin qalıqlarının yaratdığı ciddi fəsadlara aydınlıq gətirib, bunun nə üçün baş verdiyinə dair izahat verib.
"Ballistik raketlərin qarşısını almaq son dərəcə çətindir. Kiyevə atılan hər iki raket vurulub. Onlardan biri aşağı hündürlükdə vurulub, ona görə də döyüş əməliyyatları zamanı partlayış dalğasının nəticələri ola bilər. Vurulmuş raketlərin qalıqları havada yoxa çıxa bilməz, onlar mütləq yerə düşürlər. Təəssüf ki, onlar həm də yerdə ciddi fəsadlara səbəb olur, çünki raketin döyüş başlığı vurulduqdan sonra partlaya bilər. Bu baş verir”, - deyə Hərbi Hava Qüvvələri Komandanlığının Kommunikasiya İdarəsinin rəisi Yuri İqnat mətbuata açıqlamasında bildirib.
Onu da qeyd edək ki, Kiyev şəhər meri Vitali Kliçko məlumat verib ki, raket hücumu nəticəsində dörd nəfər həlak olub.