İtaliyanın paytaxtı Romadakı Müqəddəs İqnazio di Loyola kilsəsi gənc turistlər arasında populyarlıq qazanıb. Sosial media platformalarında buradan minlərlə paylaşım edilir.

Presedenttv.com xəbər verir ki, XVII əsrdə barokko memarlığı üslubunda inşa edilən kilsə tavanındakı tarixi freskaları əks etdirən böyük güzgüsü ilə sosial mediada populyarlaşıb. Kilsənin tavanında italiyalı məşhur memar Andrea Pozzo tərəfindən hazırlanmış freskalarda yezuit ordeninin banisi olan Müqəddəs İqnazio di Loyolanın cənnətə qəbulu təsvir edilir. Freskaları daha yaxından və fərqli bucaqdan görmək istəyən ziyarətçilər kilsənin ortasına yerləşdirilən güzgüdən istifadə edirlər.

Güzgü təkcə freskaları yaxından görmək üçün deyil, həm də şelfi çəkdirmək üçün istifadə olunur. Buna görə də, kilsə sosial media istifadəçilərinin sevimli yerinə çevrilib. Gənclər buranı “Romanın ən yaxşı selfi yeri” adlandırırlar. Selfi çəkmək istəyən yerli və xarici turistlər kilsənin qarşısında uzun növbələr yaradırlar.

Kilsəyə giriş pulsuz olsa da, güzgü qarşısında şəkil çəkdirmək istəyənlər 1 avro ödəməlidirlər.