Fransada solçular ifrat sağçılara qarşı nümayişə hazırlaşırlar
“Əyilməz Fransa” və “Ekoloqlar” partiyalarının nümayəndələri aprelin 6-da paytaxt Parisdə ifrat sağçılara qarşı mitinq keçirmək barədə çağırış ediblər.
Aksiya bazar günü saat 15:00-da paytaxtın “Place Vauban” meydanında keçiriləcək.
Mitinqin təşkilatçıları olan solçular hakimiyyət bölgüsü və qanunun aliliyinin əsas prinsiplər olduğunu hər kəsə xatırlatmaq üçün nümayiş etdiklərini bildiriblər. "Qanunun aliliyi, həqiqətən də müqəddəs və toxunulmazdır. Bazar günü mitinqə gəlin və bunu xatırladın!", - deyə “Ekoloqlar” partiyasının milli katibi Marin Tondelier “X” hesabında bildirib.
Qeyd edək ki, aprelin 6-da sağçı “Milli birlik” partiyasının parlament fraksiyasının rəhbəri Marin Le Penə dəstək aksiyası da keçiriləcək. Məhkəmə tərəfindən mühakimə olunan Marin Le Pen Avropa İttifaqının vəsaitlərini mənimsəməkdə təqsirli bilinir.
