Respublikamızda iki gün davam edən leysan yağışlar ciddi fəsadlara səbəb olub.
Sakinlərin şikayətləri əsasında çəkliş qrupumuzla  Bakı şəh, Binəqədi ray, Xocasən qəsəbəsinə yollandıq. Çəkiliş zamanı ərazinin tamamilə su ilə dolu olduğunu, küçələrin və həyətlərin keçilməz vəziyyətinin şahidi olduq. Presedenttv.com-un məlumatına görə, ən ağrılı məqamlardan biri də şəhid İlqar Ramazanlının ailəsinin yaşadığı ev ilə şəhidin ev muzeyi su basqınına məruz qalıb. Onun anası vəziyyətlə bağlı şikayət edərək bildirib ki, şəhidə məxsus otaq belə su içində qalıb.
yorğan-döşəklər, məişət və elektrik avadanlıqları da daxil olmaqla, demək olar ki, bütün əşyalar suyun içində qalaraq yararsız vəziyyətə düşüb.
Sakinlərin sözlərinə görə, yaranmış vəziyyətlə bağlı dəfələrlə Azərbaycan Respublikasının Fövqəladə Hallar Nazirliyi ilə əlaqə saxlanılsa da, zənglərə cavab verilməyib.

Bundan əlavə, ərazi sakinləri bildirirlər ki, kanalizasiya sistemində mövcud problemlər uzun illərdir öz həllini tapmayıb. Onların iddiasına görə, məsul qurum olan Azərsu Açıq Səhmdar Cəmiyyəti tərəfindən bu istiqamətdə indiyədək effektiv tədbir görülməyib.
Qeyd edək ki, ərazidə su basma halları ilə bağlı şikayətlər xüsusilə son günlər daha da artıb. Sakinlər problemin təcili şəkildə aradan qaldırılmasını və aidiyyəti qurumların məsuliyyət daşımasını tələb edirlər.
Baş redaktor: İntizar Əmirova