Gürcüstanda orta məktəblərin sayı azaldı
Cari tədris ilinin əvvəlində Gürcüstanda 2294 orta məktəb fəaliyyət göstərib. Ötən il isə bu rəqəm 2296 olub. Bu da ölkədə orta məktəblərin sayının azaldığını göstərir.
Presedenttv.com xəbər verir ki, bu barədə Gürcüstan Milli Statistika Xidməti məlumat yayıb. Bildirilir ki, hazırda Gürcüstanda 2086 dövlət məktəbi, 208 özəl məktəb var. Regionlar üzrə ən çox məktəblər İmeretidə yerləşir. Belə ki, ümumi məktəblərin 17,1 faizi bu bölgədə fəaliyyət göstərir. Bununla belə, məktəblilərin sayına görə Tbilisi liderdir - 35,8 faiz. 2024-2025-ci tədris ilində Gürcüstan məktəblərində 640,7 minə yaxın şagird təhsil alır ki, bu da ötən illə müqayisədə 1 faiz çoxdur. Şagirdlərin ümumi sayının 48,3 faizini qızlar, 51,7 faizini oğlanlar təşkil edir.
Cari ildə 41,7 min şagird məktəbi bitirib ki, bu da ötən illə müqayisədə 11,8 faiz azdır. Məlumata görə, 2024-2025-ci tədris ilinin əvvəlinə ölkə məktəblərində 66 mindən çox müəllim çalışıb ki, bu da ötən ilin müvafiq dövrü ilə müqayisədə 3,7 faiz çoxdur. Müəllimlərin 87,5 faizini qadınlar, 12,5 faizini isə kişilər təşkil edir.
