“Neftçi”nin qəlbimizdə xüsusi yeri var. Orada o qədər tanınmış, bizdən də yaxşı və güclü futbolçular çıxış ediblər. Hamımız o vaxtdan öyrənə-öyrənə gəlmişik. Anatoli Banişevski, Kazbek Tuayev, Mübariz Zeynalov, Səmədağa Şıxlarov və adlarını saymaqla bitməyən dahi, yaxşı futbolçular olub. Ona görə də “Neftçi” Azərbaycan futbolunun tarixidir.

Presedenttv.com xəbər verir ki, bu sözləri AZƏRTAC-a açıqlamasında Azərbaycan çempionatları tarixində 1000-ci oyununu keçirməyə hazırlaşan “Neftçi”nin sabiq futbolçusu Vidadi Rzayev deyib.

Veteran yarımmüdafiəçi bildirib ki, “ağ-qaralar” Azərbaycan futbolunun flaqmanıdır: “Amma təəssüf ki, “Neftçi” son illərdə bu adı doğrultmur. Buna baxmayaraq, komandaya uğurlar arzulayıram. Əlbəttə, həmişə bizim hər birimizin fəxr etdiyi bir klub olub. Müstəqillik dönəmində oynadığımız vaxtlarda da, Sovet dönəmində də... Mən ilk dəfə 1986-cı ildən 1991-ci ilə kimi, yəni SSRİ dağılana qədər bu komandada oynamışam. Azərbaycanın SSRİ dönəmində yüksək dəstədə ən uğurlu təmsilçisi məhz “Neftçi” olub. Ona görə də SSRİ dağılandan sonra bu komandaya flaqman adını elə-belə verməmişdilər. “Neftçi” tarixdir”.

“Neftçi”nin heyətində avrokuboklardakı çıxışını xatırlayan Vidadi Rzayev həmin oyunlar barədə fikirlərini bölüşüb: “Neftçi”də uğurlu çıxışım müstəqillik dönəminə, 2000-ci illərin əvvəllərinə təsadüf edir. Çempionlar Liqasında "Şiroki Briyeq”i keçdik, bir dəfə də Bakıda MOİK-lə qolsuz heç-heçə etdik. Həmin vaxt artıq mənim yaşım çox idi”.

Təcrübəli mütəxəssis komandanın cari mövsümdə çempionluq şanslarından da söz açıb: “Hazırda çempionatda ən yaxşı təsir bağışlayan komanda “Sabah”dır. Mən həmişə “Qarabağ”ı favorit görürdüm, amma “Sabah” doğrudan da bu il çox yaxşı çıxış edir. Ötən mövsümdən bu yana ən yaxşı oynayan komandalardan biridir, bəlkə də birincisidir. “Neftçi” isə hələ çempionluğa oynayan komanda təsiri bağışlamır. Düzdür, indidən proqnoz vermək, fikir bildirmək tezdir. “Turan Tovuz” da qızıl medallar uğrunda oynayır, amma çempionluq üçün bir yer var. Bəlkə qışda transfer pəncərəsi açılanda “Neftçi” heyətini yeni oyunçularla gücləndirər və mövsümün ikinci hissəsində daha yaxşı çıxış edər. Ona görə əvvəldən nəsə demək düzgün deyil. Ümumi götürsək, “Sabah” hazırda “Neftçi”dən üstün görünür. Təki, mən yanılım, “Neftçi” çempion olsun. Bu komandanın ürəyimizdə yeri başqadır. Karyeramın böyük hissəsini bu komandada keçirmişəm”.

Qeyd edək ki, “Neftçi” Azərbaycan çempionatları tarixində 1000-ci oyununu sentyabrın 18-də - Premyer Liqanın VI turu çərçivəsində səfərdə “Qəbələ”yə qarşı keçirəcək. Komanda hazırda turnir cədvəlində 12 xalla 2-ci pillədə qərarlaşıb.