Böyük Britaniyada ev təsərrüfatlarının 2022-ci ildən bəri ən ağır qış enerji böhranı ilə üzləşə biləcəyi barədə xəbərdarlıq edilib.

Presedenttv.com AZƏRTAC-a istinadla xəbər verir ki, enerji təchizatçılarını təmsil edən “Energy UK” hökuməti aşağıgəlirli ailələrə daha çox dəstək göstərməyə və enerji hesablarına tətbiq olunan rüsumların azaldılmasını davam etdirməyə çağırıb.

Təşkilatın məlumatına görə, tipik ev təsərrüfatının enerji hesabı 2027-ci ilin əvvəlində 2 min 100 funt sterlinqə yüksələ bilər. Bildirilir ki, bu, 2022-ci ildəki qiymətlərlə 2 min 500 funt sterlinqə bərabərdir.

2022-ci ildə Rusiyanın Ukraynaya müdaxiləsindən sonra qaz böhranı yaranmış və hökumət enerji qiymətlərinə zəmanət mexanizmi ilə müdaxilə etmişdi. Enerji qiymətlərinin yüksələcəyi ilə bağlı xəbərdarlıqlar Baş nazir Endi Börnhemə ailələrin maliyyə yükünü azaltmaq üçün yeni tədbirlər görməsi istiqamətində təzyiqi artırıb. Endi Börnhem enerji hesablarına tətbiq olunan ƏDV-ni azaltdıqdan sonra büdcə çərçivəsində ailələrə “nəfəs almaq” üçün imkan yaradacağını vəd edib.

“Energy UK”un baş icraçı direktoru Dhara Vyas bildirib ki, enerji hesabları sonuncu dəfə 2022-ci ildə müşahidə olunan səviyyələrə çata bilər. Onun sözlərinə görə, eyni miqyaslı böhranın yaranmasını gözləmək olmaz və 2022-ci ildəki vəziyyətdən nəticə çıxarılmalıdır.