Qara dənizdə limanlara və mülki gəmilərə edilən hücumlar Ukrayna taxıl ixracını təhdid edir və Avropadan kənarda ərzaq qiymətlərinin artmasına səbəb ola bilər.

Presedenttv.com xarici mediaya istinadla xəbər verir ki, Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas bunu BMT-nin qərargahında naviqasiya azadlığı və qlobal ərzaq təhlükəsizliyinə həsr olunmuş görüşdə bildirib.

Onun sözlərinə görə, Ukrayna qlobal buğda ixracının təxminən 10 faizini və qarğıdalının 15 faizini təmin edir, kənd təsərrüfatı ixracının təxminən 90 faizi də Qara dəniz vasitəsilə daşınır.

Kaya Kallas mülki gəmilərin təhlükəsiz keçidinə və liman infrastrukturunun qorunmasına çağırıb.

Rumıniya xarici işlər naziri Oana-Silvia Toiu isə qeyd edib ki, tammiqyaslı münaqişənin başlanğıcından bəri onun ölkəsinin limanlarından təxminən 60 milyon ton Ukrayna taxılı və digər kənd təsərrüfatı məhsulları keçib. O əlavə edib ki, Rumıniyadan keçən alternativ marşrutlar Qara dəniz gəmiçiliyini tam əvəz edə bilməz.

Nazir Afrika, Yaxın Şərq və Asiyadakı ərzaq bazarları üçün riskləri qeyd edərək vurğulayıb: “Qara dənizdə baş verənlər regiondan kənarda ağır nəticələrə səbəb olur”.