Böyük Britaniyanın Milli Səhiyyə Xidməti (NHS) beyin şişlərinin diaqnostikasını əhəmiyyətli dərəcədə sürətləndirən yeni testdən istifadə etməyə başlayıb.

Presedenttv.com AZƏRTAC-a istinadla xəbər verir ki, yeni genomik test vasitəsilə əvvəllər nəticəsinin əldə olunması səkkiz həftəyədək çəkə bilən müayinə cəmi iki saat ərzində tamamlanır. Test həkimlərə xəstədə hansı növ beyin şişinin olduğunu müəyyən etməyə imkan verir.

Mütəxəssislər hesab edirlər ki, diaqnozun daha tez qoyulması xəstələrin radioterapiya və kimyaterapiya da daxil olmaqla müalicəyə daha erkən başlamasına imkan yaradacaq. Eyni zamanda, xəstələrin nəticəni gözləyərkən həftələrlə qeyri-müəyyənlik və narahatlıq yaşamasının qarşısı alınacaq.

Yeni texnologiyadan faydalanan xəstələrdən biri Nottinqemdən olan 55 yaşlı Stiv Palmerdir. O, idman zalında huşunu itirdikdən sonra aparılan müayinələr nəticəsində beyin şişi diaqnozu alıb. Həkimlər şişin çıxarılması əməliyyatı zamanı yeni testdən istifadə ediblər və nəticəni əməliyyat hələ davam edərkən əldə edə biliblər. Test Palmerdə dördüncü dərəcəli qlioblastoma olduğunu müəyyən edib.

“NHS England”ın məlumatına görə, test şişdən götürülmüş nümunənin genetik kodunu sürətlə təhlil etməklə işləyir və İngiltərədəki ixtisaslaşmış tibb mərkəzlərində pilot layihə çərçivəsində tətbiq olunacaq. Hazırda təxminən 150 müxtəlif növ beyin şişi məlumdur. Onların bəziləri yavaş inkişaf etdiyi halda, digərləri daha aqressiv xarakter daşıyır və hər bir şiş növünün müalicəyə reaksiyası fərqli ola bilər.